EDITORIAL SALURIK 03 MARSU 2008

Loron Mundial ba Feto ne'ebé monu iha loron 8 fulan Marsu hanesan loron importante ba feto iha mundu tomak atu halo refleksaun kona-ba luta ba igualidade. Desde uluk kedas, feto hanesan sexu maioria husi populasaun iha mundu moris iha disigualidade nia laran. Maibé situasaun ida ne’e komesa iha mudansa bainhira feto maluk sira komesa re-organiza an atu luta ba igualidade.

Iha Timor Leste maski Governo Timor Leste asina ona konvensaun CEDAW, disigualidade jéneru mosu nafatin iha ita nia le’et hanesan kazu violénsia baseia ba jéneru akontese nafatin, feto maluk sira sei barak moris iha susar nia laran, do’ok husi edukasaun no tratamentu saúde diak. Labarik feto sira mos barak la bele ba eskola tamba problema ekonomia no familia. Maibé kondisaun ida ne’e mos provoka feto maluk sira atu brani luta nafatin.

Rede Feto hanesan salurik ba organizasaun feto hamutuk 18 implementa nia programa no atividade atu bele hakbi’it vida feto sira liu-liu iha area rural. Liu husi edisaun ida ne’e, Salurik sei loke klean liu tan saida mak Loron Mundial ba Feto no tamba saida ita tenke investe ba feto no labarik feto.

Ami mos la haluha fahe informasaun kona-ba atividade husi membrus Rede Feto nian hanesan FMF, Santa Bakhita, Au-Metan, OMT, OPMT, Finahada no GFFTL ba komemora Loron Mundial ba Feto. Iha pagina ikus, ami hakarak lori le’e nain sira atu hatene diak liu tan kona-ba ami nia membru GFFTL no saida mak sira halao atu bele luta ba igualidade.
Ami espera katak maluk le’e nain sira bele hetan informasaun husi edisaun ida ne’e no haburas tan ita nia hanoin no organizasaun iha baze.

Ba ita boot sira nia atensaun ami hato’o obrigada wain.